Սբ. Գաբրիել Եկեղեցի :: ԱՐՑԱԽԻ ՊԱՏՄԱԿԱՆ ՀՈՒՇԱՐՁԱՆՆԵՐ

Սբ. Գաբրիել Եկեղեցի

Ադրբեջան / Հյուսիսային Արցախ / Խանլար / Բրաջուր

Ճարտարապետություն

Գյուղամիջի Սբ. Գաբրիել եկեղեցին արևելյան ճակտոնի գագաթին քառասյուն զանգակատնով, միանավ, թաղածածկ, անմշակ քարով, կրաշաղախով կառուցված շինություն է:

Սամվել Կարապետյան, Հյուսիսային Արցախ, Երեւան, 2004, էջ 321:

Պատմություն

Ի դեպ, եկեղեցին կառուցող Բաբաջանի մասին ավանդաբար պատմել են, թե. «...մեծ կարողութիւն է ունեցել և այն ժամանակուայ Գանձակում նստող Ջաւադ-խանը դրանից միշտ փող (խարջլըղ) է պահանջելիս եղել. մի օր այդ խանը ասում է. Բաբաջան, ինչո՞ւ իմ փողը շուտ է սպառւում, իսկ քոնը չի սպառւում: Պատասխան է ստանում. Խան սաղ օլսըն, սանընքի Բաբաջան վերգսիգըր, մանըմքի ալահ վերգսի (խանը ողջ լինի, քոնը Բաբաջանի տուածն է, իսկ իմը Աստուծոյ տուածը) և այն օրից մնում են այդ խօսքերը, որ մինչ օրս էլ իբրև առած ասում են մեր գիւղերում»:

«Նոր-Դար», 1890, N 70, էջ 3:
Սամվել Կարապետյան, Հյուսիսային Արցախ, Երևան, 2004, էջ 321:

1928 թ․

Եկեղեցին փակվել է 1928 թ. կառավարության հրամանով:

Հայաստանի ազգային արխիվ, ֆ. 409, ց. 1, գ. 2658, թ. 12:
Սամվել Կարապետյան, Հյուսիսային Արցախ, Երևան, 2004, էջ 321:

1989 թ․

Մինչև 1989 թ. գյուղի հայ բնակչության բռնագաղթը եկեղեցին կանգուն էր:

Սամվել Կարապետյան, Հյուսիսային Արցախ, Երեւան, 2004, էջ 321:

Արձանագրություն, Հայերեն, Փորագիր, Հիշատակագրություն

Ճակատին եղել է հետևյալ արձանագրությունը.
Յիշատակ է Սուրբ Գաբրիէլ եկեղեցի Բաբաջան, որ է որդի Տէր Ակոբին:
Հրատ. «Նոր-Դար», 1890, N 70, էջ 3:
Ծանոթ. բրաջուրեցի Բադամ Գրիգորյանի նույն արձանագրության ընթերցումը հետևյալն է. Եկեղեցին կառուցեց Յակոբի որդի Բաբաջանը 1700 թ., ի յիշատակ իւր որդիներ Յակոբջանի, Օհանջանի, թոռների, ծոռների եւ հարս՝ Վառվառայի (Գրիգորյան Բ., Բրաջուր, «Գարդմանք», 1996, N 1, էջ 3):

Սամվել Կարապետյան, Հյուսիսային Արցախ, Երևան, 2004, էջ 321:

Տեսակը Լուսանկար
Տեսքը արտաքին
Ուղղությունը ⇐ Արևմուտքից
Հեղինակը Սամվել Կարապետյան
Աղբյուրը Սեւ-սպիտակ նեգատիվ
Տարեթիվ 1980 — 1982 թթ․