Գանձակ կայարանի Աղոթատուն :: ԱՐՑԱԽԻ ՊԱՏՄԱԿԱՆ ՀՈՒՇԱՐՁԱՆՆԵՐ

Գանձակ կայարանի Աղոթատուն

Ադրբեջան / Հյուսիսային Արցախ / Գանձակ / Գանձակ

Պատմություն
1899 թ․

Դեռևս 1899 թ. քաղաքի հյուսիսային արվարձանում, երկաթուղային «Գանձակ» կայանին հարող թաղամասի հայ բնակիչները մտադրվել էին իրենց համար կառուցել առանձին աղոթատուն: Ուշագրավ է, որ կառուցվելիք աղոթատան համար հողամաս էին նվիրել պարսիկ եղբայրներ Մաշադի Մամետ-Ջափար և Մամետ Ալի-Հյուսեին օղլի Միրաբովները:

Հայաստանի ազգային արխիվ, ֆ. 56, ց. 6, գ. 421, թ. 24:
Հայաստանի ազգային արխիվ, ֆ. 53, ց. 1, գ. 3444, թ. 16:
Սամվել Կարապետյան, Հյուսիսային Արցախ, Երևան, 2004, էջ 59:

1901 թ․

Հակառակ այն հանգամանքին, որ գանձակեցի պարսիկ եղբայրները բարյացակամորեն աղոթատան շինության համար նվիրաբերել էին անհրաժեշտ հողակտորը և դրա համար էլ Ամենայն հայոց կաթողիկոսից արժանացել օրհնության կոնդակի, 1901 թ. Գանձակի հոգևորականության ապաշնորհ ու անհեռատես գործելակերպի հետևանքով նպատակը մնում է անկատար:

Հայաստանի ազգային արխիվ, ֆ. Պ56, ց. 18, գ. 421, թ. 24, 32:
Սամվել Կարապետյան, Հյուսիսային Արցախ, Երևան, 2004, էջ 59:

1912 թ․

Համենայն դեպս, 1912 թ. աղոթատունը դեռ կառուցված չէր: Ի դեպ, նախատեսվել էր կից կառուցել նաև ուսումնարանի շենք: Հայտնի է, որ վերջինս գործել է 1911 թ., բայց աղոթատան ճակատագիրը մնում է անհայտ: